Presidenti amerikan Donald Trump, ka kritikuar ashpër një portret të tij të vendosur në Kapitolin e Shtetit të Kolorados, duke e cilësuar atë si një nga më të këqijtë që ka parë ndonjëherë. Përmes një postimi në rrjetet sociale, Trump ka akuzuar guvernatorin e Kolorados, Jared Polis, për vendosjen e një pikture që sipas tij, shtrembëron qëllimisht tiparet e tij.
Trump ka theksuar gjithashtu se artistja që realizoi portretin kishte krijuar më parë një pikturë të ish-presidentit Barack Obama, të cilën ai e përshkroi si “të mrekullueshëm”. Sipas tij, cilësia e punës së saj ka pësuar një rënie të dukshme, duke e përshkruar portretin e tij si një dëshmitar të kësaj përkeqësimi.
“Më mirë të mos kisha fare një portret sesa këtë që kanë vendosur” u shpreh Trump, duke shtuar se ka marrë shumë reagime nga qytetarë të Kolorados, të cilët janë të indinjuar me pamjen e portretit.
Në reagimin e tij, Trump bëri thirrje që guvernatori Polis të largonte pikturën, duke e cilësuar atë si një “ekstremist të majtë” dhe një person të paaftë për të luftuar krimin. Trump kritikoi gjithashtu situatën e sigurisë në qytetin Aurora, Kolorado, duke akuzuar bandën kriminale “Tren de Aragua” për aktivitetet e paligjshme që kanë rritur pasigurinë.
“Jared duhet të ketë turp për veten e tij!” përfundoi Trump, duke shtuar se ky incident reflekton një problem më të gjerë të qeverisjes dhe sigurisë në shtetin e Kolorados.