Vetëm gjatë javës së kaluar, zyrtarët policorë të rajonit të Prishtinës kanë shqiptuar 4 462 masa administrative me gjobë për lloje të ndryshme të kundërvajtjeve dhe shkeljeve të kodit rrugor.
Zyra për Informim e Policisë së Kosovës ka njoftuar më 15.07.2024, se aktivitetet policore në sferën e sigurisë në trafikun rrugor kanë qenë më të theksuara gjatë javës së kaluar.
Për të mbajtur në nivel sigurinë në lokacione të ndryshme, Policia thotë se janë realizuar 221 urdhëresa të gjykatës, prej tyre 55 urdhëresa për vepra penale, ndërsa të tjerat për kundërvajtje, seanca e verifikime.
Sipas Policisë, në përputhje me urdhëresat, pas përfundimit të procedurave policore, personat e dënuar me burgim janë dërguar për vuajtje të dënimit, ndërsa personat e dënuar me gjobë, janë liruar, pasi të njëjtit kanë kryer obligimet e caktuara në urdhëresa.
Në harkun e njëjtë kohor, Policia ka bërë të ditur se ka sekuestruar 7 armë zjarri, të llojeve dhe kalibrave të ndryshëm, si dhe dhjetëra municione të llojeve dhe kalibrave të ndryshëm.
