Në kuadër të vizitës së tij në Shtetet e Bashkuara të Amerikës, kryetari i Aleancës për Ardhmërinë e Kosovës (AAK), Ramush Haradinaj, kandidat për kryeministër, ka zhvilluar një takim pune me të Dërguarin e SHBA-së Posaçëm për Misione të Veçanta, Richard Grenell.
Në një deklaratë pas takimit, Haradinaj theksoi rëndësinë e angazhimit të Ambasadorit Grenell në Ballkanin Perëndimor, përfshirë Kosovën, në kuadër të detyrës së tij të re në administratën e dytë të Presidentit Trump.
“Kosova mbetet e përkushtuar për forcimin e marrëdhënieve strategjike me SHBA-në,” deklaroi Haradinaj, duke theksuar se synimi kryesor mbetet anëtarësimi i Kosovës në NATO.
Gjatë ditës, Haradinaj zhvilloi takime edhe me Matthew Whitaker, i përzgjedhur i Presidentit Trump për ambasador të SHBA në NATO, Guvernatoren e Iowas Kim Reynolds, Senatoren Joni Ernst dhe Kongresmenët Randy Feenestra e Zach Nunn nga Iowa e ShBA.
“Në të gjitha bisedat kam diskutuar me prioritet angazhimin e përbashkët të anëtarësimit direkt të Kosovës në NATO dhe kthimit të raportit steategjik mes dy vendeve”, tha Haradinaj.
Haradinaj, po qëndron në Shtetet e Bashkuara të Amerikës me rastin e aktiviteteve festive për inaugurimin e Presidentit Trump.